Luke 1

1– 2Emi nugundo n wo ye Shekwoyi nyi aza ku nabari ka n mwa n Kristi tukwo. Ɓa ɓei bwa a nabari ye n aza nu n ɓa ɓei wo n Yesu abara nyi. Ɓedo n aza n ɓa gye Yesu n ɓa hin tukwoyi. 3Amma mi cei pma ma dnawye ma gye ko nabari ye zhin gaiciya nu. Nsayi ma kaho gna. 4Nnabai kwa bma ho zhin ha kpe gaiciya ye n na ei wu ho nyi.

Malaika Wa Wu Wohin N Zakariya Aba

5Zaho ɓei nyi ai yiwo ge Zakaria. Wo ɓei zhin malami dnagmayi nu n esa Hiridus ɓei gyibe n cei n Yahudiya nyi. Zakaria ɓei dna n Abija ebye nu. Oɓanu ɓei zhin tnu-tnu nna duwa nyakun n sahi. Ai yi ewo nyiko ge Alizabatu. Wo ɓei zhin prist nu ce. Ntuge wo ɓei zhin Haruna Yawyi nu. 6Zakaria n Alizabatu yi ɓei zhin aza manayi nu. Ɓa ɓei n zafun manayin njesun ɓai zhin aɓo manayi. 7Amma ɓa to ɓei ni yi m, gama Alizabatu ɓei zhin lama nu. Nsayi kwa ɓai ku ze azakwoyi.

8– 9Nwyihoi Zakaria dna n aduwa nyakun wo zhin tnu-tnu, gama owo gwodo nu ɓei zhin tnu-tnu n mako yi. Kuria ku gyi wo nwo ɓalo woi zhin hadaya nna duwa nyakun ga Shekwoyi. 10Nsayi kwa nza zhi laɓa nbmi ɓai zhin aduwa. Shi ɓa ɓei zhin ɓai shin zhin nyi, nsaho-sahoi nza lo ntuge woi zhin hadaya ye pya, wato wo gyi turare na ga Shekwoyi.

11– 12Esanu wo ɓei dna n cei n haikali to wo dna ce m, wa jeje wa gye malaika gni n wo bwaizhe bwa. Zakaria wa ku jeje.

13Malaika ciwo ge, “Zakaria, to wo dna m, gama maɓe ma gnaho ge Shekwoyi ku eho aduwa wo. Oho nyiko alizabatu ɓa ma eɓi. Hoɓa tu ewoye ge Yohanna. 14Eho n Alizabatu yi fyeɓa bwa agmada yakwo esalu n fye ɓei mawo n cei. Aza n mwa be gye ɓei dagma nfyei n jesun. 15Gama woɓa zhin Shekwoyi oza nu sosai nya. Fye to yege wo sin ejen ko fyewyi, amma wo ɓa nu n zafun gyi-gyi-yi har ma kafin a ma wo. 16Owonu ɓa zhin a Yahudawa n mwa ɓa ɓe Shekwoyi aba. 17Owo zafun ɓa wu ngye anabi Iliya nya nu. Wo ɓa ɓe n Kristi abye ntu ge wa zhin aza ɓa zhin shiri ntu Kristi ɓeɓe ɓo. Aza yakwo bugba ɓa wu ngye aɓi nya. Woɓa zhin aza nɓa ta woɓom ɓa kuze aza nɓeyekpe yi.”

18Zakaria wa ci malaika ge, “Ai, deye ta ye zhin! Ntuge mila kwo, emi nyikwo jesun, wo la kwo.”

19Nsayi malaika ciwo ge, “Emi nu zhin Malaika Jibrailu. Mi gni n Shekwoyi abye nu cici. Ewo nu na tnumi nge ma ɓe eho aba. 20Amma shi ho to gami ɓeda gaiciya nyi m, ho ta mi ha shan ɓedam, sai eho nyikwo wola eɓi ma. Gama dole emi ɓeda kwa nu.”

21Esa n malaika ɓei da ɓo n woi nyi kwa, azai zhi n bmi ɓai pmi Zakaria to ɓai kpeɓo n kwo zhin woi la mwasa lo nu. 22Esa n wo ɓei gmiɓe, to ɓa gye woi mi woi daɓo m. Aza ku kpe ge woku ɓewyegye gye gama wo ɓei ku zhin ɓa n nab-wai. 23Zakaria kwa wa dna n aduwa nyakun woi zhin tnu-tnu shi ewo anyipyeyi ɓei ku nu wa lo api. 24Esafyewyi, Alizabatu ewo nyikwo wa gni n nuboi. Alizabatu kwa wa wohin so dna har apya ngu atnu.

25Wa cige, “Shekwoyi zhin eza sun-sungye nyanu. Gama Wola vinyikwo shin miya har woi la eɓi gami.”

Alkawali Oɓi Nya

26Dna n epya tnanyihi Shekwoyi wa tnu n malaika yi, ai yi wo ge Jibrailu, n Nazarat nkwo dna n Galili nyi. 27N nabai walo ɓinyikwoi ho aba n wo to shin gyewa n zaho-zahoyi m. Ai yiwo ge Maryamu. Ayi owo nugunyi ge Yusufu. Wo ɓei zhin Dawuda Yawyi nu.

28Jibrailu kwa wa lo Maryamu aba wa sawa mi wa cige, “Ho zhin oza ye-yehi nu. Shekwoyi kunsun lo n hoi.”

29Maryamu wa jeje to wa bwa awyega n nyayi n malaika ɓei gna wo m.

30Amma Malaika ciwo ge, “Maryamu to wo dna m, gama Shekwoyi la tuge ho ɓa bwa anabarka n mwa. 31Esa fyewyi hoɓa gni n nuboi ha ma eɓi-nugbayi. Ha tuwoye ge Yesu. 32Eɓi hi ɓa zhin eza dnagmayi nu har aɓa yiwo ge Shekwoyi ɓi. Shekwoyi kwa woɓa ga eɓiye ewo dada ʼbe wato woɓa tuwo n Dawuda shinkpegye. 33Woɓa gyibe tu n Israila tukwo. Ewo begyi kwa kwo ta shan zo m.”

34Maryamu wa nya malaika ge, “Amma deye ɓa yezhin n wuna? Gama mito shin gyewan n zanugbayi doho-dohoyi m.”

35Malaika ciwo ge, “Zafun Gyi-gyi-yi ɓa ɓe daho (Shekwoyi iko kwa- kwo ɓa zekpe ho. Ntucenu eɓi nho ɓa ma nyi, wo ɓa zhin oza gyi-gyi-yi nu. Wo ɓa zhin Shekwoyi eɓi nu. 36Nsaiye kwa eho dnawun wato Alizabatu wo gnilo n nuboi apya ngnu tnanyi. Wola bwa woi la kwo. A ɓei zhin ai cige wota maɓi m. 37Gama Shekwoyi alkawali doho-dohoyi dole kwa nu.”

38Nsayi Maryamu wa cige, “Mi zhin Shekwoyi fyenu nu. Milaye ge wo zhin n miyi shi wo cei pma. Shekwoyi wo zhin eho ɓeda vinya n ha gnami nyi kwa nu.” Nsayi malaika bwi wye. To Maryamu wa shan wo wye gye m. 39– 40N anyipyei fyewyi avun, Maryamu wa lo azhiɓeyi n ape kni n Yahudiya, aba n Zakaria ɓedo n Alizabatu ɓei fi nyi.

41Sanu Maryamu ɓei ɓi ɓa gna eɓi n ko ɓei dna n Alizabatu nubo nyi kwa shan-shan dna mi. Alizabatu kwa wa nu n zafun yi.

42Wa ci Maryamu ge, “Shekwoyi ku alheri wu ho n anyikwo aje vinya. Eho ɓi kwa wo ɓa zhin a ga Shekwoyi mwa-mwa n dudu. 43Ai mi to shin esa ye pya bwa m, gama eza n woɓa ma emi Dagayi nyi wola ɓemi gnaɓi. 44Esanu n ha ɓe hoi ɓi mi gna nyi, shi mawo oho begye eɓi nkwo dna n mi nubo nyi, kwoyi shan-shan ntu agmada ɓo. 45Ai hola gaiciya ga nge nya n Shekwoyi da kwo ɓa nu. Cenu na zhin woi tu ho anabarka ye pya.”

46Nsayi Maryamu wa cige, “Ma gode n Shekwoyi. 47Mi dagma lo dna n Shekwoyi n wo gni mi nyi. 48Gama wa shi ewo nyigun awye n wo to zhin nyaho nyi m. Nsai ye kwa aza ɓa yi mige anabarka da har nyalo-nyalo. 49Gama Shekwoyi iko da nwo gyi-gyi-yi nyi wo ku oɓo wo-woyi zhin ga mi. 50Wo gye aza sun-sun vinya n saho-sahoi, aza vinya nba gawo mwa-mwa nyi.

51“Ewo atnu-tnu zhin aɓo wo-woyi nu. Wo zhin wa zun aɓoko da ɓedo n atuko-gnana-kwoyi anyigyi ya. 52Wo la begyi gmi n asu akun woi la ga azagbayi. 53Wo ku anya manayi ga awyekwo yi, amma anyabwayi wa ku ɓa gnami ntna nyaho. 54Njesun n saiye wola owo fyenu ɓo pa, wato Israila. Woto ze owo alkawali amwi n wo ɓei zhin ge wa gyeɓa sun-sun. 55Gama woɓo zhin eyi dada Ibrahim ɓedo n wo aɓiyi, alkawali nge woɓa gyeɓa sun-sun har nyalo-nyalo.”

56Maryamu kwa wa dna n Alizabatu yi har apya ngnu ata. Shi apya ngnu ata ɓei ku wo nu nsahi, wa ieze lo owo zhi.

Ala Yohanna Bapizma Zhinyi Ma

57Nsayi kwa esai la Alizabatu nu n woɓa kagna n cei, wa ma eɓi nugbayi. 58Nabari ewo kagna nya kwa gnami laɓa n wo aje vinya, ɓai da shi Shekwoyi wa gyewo sun-sun n wu. Ai da zaho-zahoi laɓa.

59Shi anyipyei ɓei ku nu ngun nyimwa-nyimwa, owo anugundo ɓaɓe ntu ge ɓa dagma n kaciya zhin sa. Ɓai gye ge aɓa yi eɓi ge Zakaria nu, wato owo dada ye nu.

60Amma Alizabatu wa cige awo. “Aɓa yiwo ge Yohanna nu.” 61Aza ciwo ge, “Eh! Ho shingye ai yi nyikadonu n yei pyayi n fye bye a?” 62Nsayi ɓa nya eɓi da, ɓai zhin wo n nabwai.

63Wa gna ge agawo takarda n nabai wa ka ɓeda kpe. She a ɓei gawo, wa katu ge, “Aɓa yiwo ge Yohanna.” Deye ca wo aza vinya. 64Nsayi-sayi kwa Zakaria wa ya ɓeda njesun, wa ga Shekwoyi mwa-mwa. 65Ca wo aza laɓa n ɓa ɓei zhi ɓo nyi. Nabari yi kwa gakpe laɓa n Yahudiya ape kni. 66Zaho-zahoi n wo ɓei wo ɓeye kwa, wa zhin tunani n mwa wa cige, “Ai mita kpelo shi eɓi ye ɓa ze m?” Gama Shekwoyi kun-sun lo n woi n zokwo do gbo.

67Zakaria owo dada kwa wa nu n Zafun Gyi-gyi-yi wa zhin anabci ye, wa cige,

68“Fye ga Dagayi, Shekwoyi Israila nya mwa-mwa, Gama wola ɓe ntu ge wa gye ewo aza, woi la gni-gni gaɓa njesun. 69Wo ɓa tnuyi, Eza dnagmai n wo ɓa gni yi nyi. Wo ɓa gmi n Esu Dawuda Shekwoyi fyenu puwa nu. 70Zagni yi ɓa ɓe shi Shekwoyi ɓei zhin alkawali, n wo anabi gyi-gyi-yi gbe. 71Oza n wo ɓa gniyi n yi anuwun yi aknu, n na zayi vinya n ɓa wun yi nu nyi. 72– 73Shekwoyi ku sun-sun gye eya dada. Wo ku sun-sun gye Ibrahim gama wola owo alkawali ɓo pa, n wo ɓei zhin Ibrahim nyi. 74Har woi gayi iko ya ci wo n tna edna. Eyi anuwun yi dna ta shan yiwo lo m. 75Woi kuyi ze aza gyi-gyi-yi n Shekwoyi ɓami wa goyi, har ya zhi n wo aba n tna edna.

76“Oho, emi ɓi kwa aɓa yiho ge anabi Shekwoyi anabarkada nya. 77Ho ɓa wu ewo aza shi ɓa-ɓa bwa gni-gni n wo. Wato a zhan ɓa ya n ɓa laifi. 78Anya deye ɓa zhin vinya ntuge Shekwoyi sun-sun gye sa to diya m. Woɓa gayi buzangna gni-gni nya. 79Wa ga aza buzangna n ɓa filo n wyegma ɓedo n efi nyi. Njesun wa zhin yi fi n zokwo bugba fu nya.”

80Eɓi hi wa ye Shekwoyi n mwa. Osa n wo ɓei mwa n cei kwa, wo ɓei dna n zhabui n wo gmanyi yi har osa n wo ɓei ya aza waʼazi zhin laɓa n Israila nyi.